روح

حلوة كده؟؟؟

2007-05-10T14:21:00.000-07:00

سؤال بيدور فـ بالي بقالي كتير .... وقلت أشرككم معايا فيه

تعالوا كل واحد فينا يدورإيه أحلى حاجة فى حياته.... ويسأل نفسه ياترى أنا كنت هقدر أعيش من غير النعمة دى؟؟ اللى هيقول بــابــايــا ومــامــتـي ...واللى هيقول عيـــلتــي ... واللى هيقول صوحــابــي واللى هيقول الـــتــيــم بتاعى لكن أنا شايفة إن أجمل حاجة فى الحياة بجد لما تحس إن فيه حد دايمًا بيفهمك ويسامحك ..معاك فى كل لحظة أرحم بيك من أمك؟ يخاف عليك أكتر من نفسك يبعت لك ناس جامدة تاخد بإيدك وتساعدك وتشدك فى الخير مهما قصرت فى حقه

تلاقيه دايمًا جنبك ..وبياخد بإيدك ... تلجأ له فى أي وقت وكفاية بس تقول وكلتك مهما تعدى عليك صعوبات فى حياتك دايمًا معاك ويساعدك وهو الغنى عنك وقت ضيقك تدخل أى مكان لوحدك وتبكى له وتتكلم معاه وتحس بعدها راحة
شديدة وكأنك رميت كل اللى على كتفك يقول لك بس اتعب وسيب عليا النتايج

أيوه .... هو ربـــنــا

أكبر نعمة إن ربــنــا هو ربــنــا...ربــنــا اللى خلقنا عشان يرحــمنـــا ... خلقنا عشان يــتــوب علينا ... خلقنا عشان يــسـعــدنا ... خلقنا عشان يحبـــبــنا فى رسولنا خلقنا عشان يرزقــنــا بكل النعم اللى فى حياتنا

خلقنا عشان يدخلنا الجـــــنة .... خلقنا عشان بيحــبــنا

كفاية الأرض والــسمــا لما يقولوا لو شئت لطبقنا عليهم يقول لهم لو خلــقــتــمــوهـــم لرحمـتــمـــوهــــم

ربـــنــا اللى عمل كل الحاجات دى لينا وسخر كل شئ فى الحياة عشان احنا نـــرتــــــاح

ايوا الكلام دا كله حلو ... لكن السؤال يا جماعه .... احنا فين من دا كله؟؟؟؟
هل احنا بنجتهد على قد مانقدر؟؟؟؟؟
احنا عاملين إيه مع ربـــنــا ؟؟؟؟؟؟؟؟ سؤال يستحق ان كل واحد فينا يقف مع نفسه ويسألها ؟؟ هــــــــــــــــــــــــــــا؟ احنا فين ؟؟؟ ربــنــا راضى؟؟؟!!!!! حاسين برضاه ولا مقلقين؟؟؟؟؟؟ ها يا جماعه السؤال دا اجابته مع كل واحد فينا بس والموضوع بينه وبين ربـــنــا ودى بس كانت وقفه مع النفس ويــــــارب يكون بعدها تغيير للأفضل ومحدش ييأس من رحمة ربــنــا موجود معانا فى كل لحظة ومستنى بس نقول يــــــــــارب

اللهم احرسنا بعينك التى لاتنام واكنفنا بكنفك الذى لا يرام،واغفر لنا بقدرتك فلا نهلك فأنت رجائنا،ربِّ كم من نعمة انعمتها علينا قل لك عندها شكرنا وكم بلية ابتليتنا بها ، قل لك عندها صبرنا ،فيامن قل عند نعمته شكرعباده فلم يحرمهم ويامن قل عند بليته صبرعباده فلم يخذلنهم ،ويا من رآنا على الخطايا ولم يفضحنا ،ياذا المعروف الذى لا ينقضى أبدا ،وياذا النعماء التى لا تحصى عددا،ارحمنا وارض عنا
وصلي اللهم وسلم وبارك على حبيبنا محمد

زيــنــب ........ كائن نوراني

مقياس السعادة

2007-04-28T08:53:00.000-07:00

بسم الله الرحمن الرحيم

السلام عليكم ورحمة الله وبركاته

في الحلقة التانية من حقيقة القلوب

نرجع للتقسيم الأساسي عن القلب
بعد طبقة الصدر المواجهة للعالم الخارجي .... وبعد القلب اللي بيصب فيه الصدر كل اللي بيدخل عليه من العالم ده ... بنلقى فيه طبقة الفؤاد ... وهيه منطقة التثبيت ...وهيوضح معنى التثبيت من القرآن: {وَقَالَ الَّذِينَ كَفَرُوا لَوْلَا نُزِّلَ عَلَيْهِ الْقُرْآنُ جُمْلَةً وَاحِدَةً كَذَلِكَ لِنُثَبِّتَ بِهِ فُؤَادَكَ وَرَتَّلْنَاهُ تَرْتِيلاً }الفرقان32
التثبيت على فكرة هوه الربط على القلب بالايمان ... زي قصة أصحاب الكهف " وربطنا على قلوبهم إذ قاموا فقالوا ربنا رب السماوات والأرض لن ندعوا من دونه إلها ... " الكهف 14
يعني قبل ما يوصل الكلام للعقل ... ده إن كان الكلام خير وإيمان ... ربنا بيربط على القلب علشان لو حصلت له أي فتنة يبقى عارف الطريق فين ويبقى واقف بشجاعة أمام أي هجوم خارجي .... فتدخل الفتنة على لب القلب ... العقل يعني ...فيكون عقل من الأول وفهم إنه ابتلاء ... وما يتعرضش لتأثير من الفتن
لكن يبقى سؤاااال محيرني جدا .... أنا عرفت إن دي تقسيمة القلب وعرفت سبب انشراح الصدر وضيقه .... طيب هوه أنا سعيييييد؟؟؟؟
بجد...يعني حاسس دايما بإني مبسوط من جوايا؟؟؟وليه مش سعيد؟؟؟
أقولكوا على حاجة .... ما تيجوا ننزل الشارع ... نعيش وسط الناس ننزل لأصحابنا ... ندخل المسجد ... نمسك المصحف نقرا ولو آية أو آيتين ... ونشوف هبقى سعيد امتى؟؟ وامتى هحس بضيق الصدر ده ؟؟ نبدأ نعرض الأمور على القلب ... ونسأل ونجاوب نفسنا .... ونتقابل العدد الجاي في حوار جديد من جوانا روح

سكايار

حقيقة القلوب

2007-04-06T06:59:00.000-07:00

بسم الله الرحمن الرحيم

كل منا يحتاج لمعرفة قلبه والتفتيش بداخله ، قبل أن نبدأ في السير إلى داخل الدين ، لعلمنا بأن الدين حياة ، واتباعا لقوله تعالى "يَا أَيُّهَا الَّذِينَ آمَنُواْ اسْتَجِيبُواْ لِلّهِ وَلِلرَّسُولِ إِذَا دَعَاكُم لِمَا يُحْيِيكُمْ "سورة الانفال24 فلابد لنا من طريق للبداية ، ولابد أن يكون حديثنا دائما مصحوب بدليل من القرآن والسنة النبوية أو أحدهما
نسبح في إحدى الموضوعات الرئيسة في ديننا ... والتي يتوقف عليها تقبل العمل .. قال تعالى " يوم لا ينفع مال ولا بنون إلا من أتى الله بقلب سليم" سورة الشعراء88
القلب ... ما هو القلب؟؟؟ .... هل قلوبنا جميعا واحدة؟؟؟ إن كانت هناك أنواع للقلب فما هي هذه الأنواع ؟؟؟ وكيف أعرف قلبي وسط هذه الأنواع؟؟؟
هنتكلم النهاردة بس عن تقسيم القلب كأجزاء ... وإن شاء الله نتناول أجزائه كدراسة بأحوالها
لو تكلمنا عن القلب بلغة الطب ... هينقسم القلب - زي ما درست زمان في مادة الأحياء - إلى أذين أيمن وبطين أيمن ومثلهما أيسر...لكن لو تكلمنا عن القلب شرعا ...أو بالمفهوم الشرعي المعنوي ... فالقلب أخطر جزء من أجزاء الجسم ... وصدق الرسول حين قال" ألا إن في الجسد مضغة إذا صلحت صلح الجسد كله .. وإذا فسدت فسد القلب كله" ..يعني حقا أخطر أجزاء الجسم على الاطلاق ..القلب ..لترتب الصلاح والفساد عليه
إذا سبحنا في آيات القرآن ...نجد أن القلب قد قسم من حيث الأجزاء إلى أربعة
1- الصدر
2- القلب
3- الفؤاد
4- اللب
أما الصدر فيقول تعالى "فَمَن يُرِدِ اللّهُ أَن يَهْدِيَهُ يَشْرَحْ صَدْرَهُ لِلإِسْلاَمِ"الأنعام 125
وأما القلب فيقول {وَمِنَ النَّاسِ مَن يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللّهَ عَلَى مَا فِي قَلْبِهِ وَهُوَ أَلَدُّ الْخِصَامِ }البقرة204

وأما الفؤاد {وَكُـلاًّ نَّقُصُّ عَلَيْكَ مِنْ أَنبَاء الرُّسُلِ مَا نُثَبِّتُ بِهِ فُؤَادَكَ وَجَاءكَ فِي هَـذِهِ الْحَقُّ وَمَوْعِظَةٌ وَذِكْرَى لِلْمُؤْمِنِينَ }هود 120

وأمااللب {الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ أُوْلَئِكَ الَّذِينَ هَدَاهُمُ اللَّهُ وَأُوْلَئِكَ هُمْ أُوْلُوا الْأَلْبَابِ }الزمر18 والألباب هي العقول ...و قال علماء التفسير أن العقل محله القلب كما في قوله تعالى {أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا فَإِنَّهَا لَا تَعْمَى الْأَبْصَارُ وَلَكِن تَعْمَى الْقُلُوبُ الَّتِي فِي الصُّدُورِ }الحج46

أما عن الصدر ..فهو أخطر هذه الأجزاء .. والسبب إن الصدر هوه الجزءالمواجه للعالم الخارجي وهو أحس جزء في القلب ... بالظبط مثل بياض العين أي حاجة تقرب منها تحمر ...ويتميز بميزتين أحلاهما مُر
أما الأولى فإنه قابل للضد ... يعني ممكن يتقبل الخير ... وممكن يتقبل الشر ... ما ينفعش أقول إن الصدر هيتقبل الخير بس بداية أو من أساسياته تقبل الشر بس
والثاني وده الأخطر ... إنه إذا انشرح لأحد الضدين ...ضاق من الآخر

فَمَن يُرِدِ اللّهُ أَن يَهْدِيَهُ يَشْرَحْ صَدْرَهُ لِلإِسْلاَمِ وَمَن يُرِدْ أَن يُضِلَّهُ يَجْعَلْ صَدْرَهُ ضَيِّقاً حَرَجاً كَأَنَّمَا يَصَّعَّدُ فِي السَّمَاء كَذَلِكَ يَجْعَلُ اللّهُ الرِّجْسَ عَلَى الَّذِينَ لاَ يُؤْمِنُونَ }الأنعام125
مشكلة الصدر إنه مثل الكأس ... إما تملأه بالخير أو تملأه بالشر وهيتقبل ...لكن لو تقبل أحدهما لن يتقبل الآخر إلا بإفراغه من سابقه فإما أن تملأه بالاسلام وإما يضيق الكأس بغيره .... وهنا يتخلل السهم إلى القلب ....
والقلب هو الوعاء الرئيسي الذي ينصب فيه محتوى الكأس ... ممكن نوصفه بالاسفنج .... والاسفنج زي ما احنا عارفين لو اتبللت فقط بشيء بسيط ولو نقطة ماء هتحتويها كلها ... تسمى في الشرع "أشربت"
مثال ذلك ... بنو اسرائيل عند عبادتهم للعجل ... كان استعجالا منهم لغياب نبيهم ... وكان أيضا حب منهم لذلك ورؤيتهم للأمر ده بإنه حسن ... فعندما عرض عليهم السامري عبادة العجل ... عرضت الفتنة على الصدر فقبلها ... وانسكب الايمان من كأسه .... ودخل بدلا منه الشرك ...ثم تخلل ذلك القلب فأشربه وعبدوا العجل ... يقول تعالى
{وَإِذْ أَخَذْنَا مِيثَاقَكُمْ وَرَفَعْنَا فَوْقَكُمُ الطُّورَ خُذُواْ مَا آتَيْنَاكُم بِقُوَّةٍ وَاسْمَعُواْ قَالُواْ سَمِعْنَا وَعَصَيْنَا وَأُشْرِبُواْ فِي قُلُوبِهِمُ الْعِجْلَ بِكُفْرِهِمْ قُلْ بِئْسَمَا يَأْمُرُكُمْ بِهِ إِيمَانُكُمْ إِن كُنتُمْ مُّؤْمِنِينَ }البقرة93

نقف عند ذلك القدر اليوم ... باقي فقط حاجتين ... الأول : نشوف النهاردة أناصدري بينشرح لإيه أكتر .... وبالتالي قلبي هيتشرب إيه؟؟

يعني بفرح لما البنت الفلانية بتعدي وتسلم؟؟؟ بفرح لما بسمع الأغنية الفلانية؟؟؟ بفرح لما بشوف أحد الصالحين ؟؟؟ بفرح لما بسمع قرآن وأنا ماشي فـ الشارع؟؟؟

أترككم على خير ... وأعوذ بالله من أي خطأ أو ذلل لست أقصده

سبحانك اللهم وبحمدك أشهد أن لا إله إلا أنت أستغفرك وأتوب إليك

سكايار